UN ANO MÁIS O CEIP FERMÍN BOUZA BREY COMEZA O CURSO COAS OBRAS SEN REMATAR

Despois de que o curso pasado quedáramos sen a cuberta da pista polideportiva do CEIP Fermín Bouza Brey e dos reiterados compromisos do Concello de que este ano teriámola rematada antes de que comezara o curso, asistimos coa decepción que da o costume a que non só non está rematada xa comezado o curso, senón que ademais non se vai a rematar. 

A escusa deste curso -segundo a concelleira de ensino- é que “a empresa construtora atopou problemas que non foran orzados e o diñeiro non chega para rematar a obra”. Estes problemas, sempre segundo Cristina Fernández, pasan pola consistencia e características do terreo. Algo que polo visto, non previron.

Así, de momento, o alumnado do centro non conta cun patio cuberto rematado. Co que si conta é cun espazo menos de recreo, xa que a obra está precintada para que non pisen por riba. 

Para atallar este problema, a solución do concello pasa porque as familias fagamos presión á Xunta para que esta asuma o custe do remate das obras, 6.000€ aproximadamente, mentres que a dirección do centro plantexa un crédito bancario. 

Lembremos que o orzamento total desta obra (orzamento que figura nos documentos) ascendeu a 188.277,02€ e foi asumido na súa totalidade pola Deputación de Pontevedra. Ninguén nos informou de porqué no panel colocado no centro figura como orzamento 180.653€, case 8.000€ menos. 

 

Lembremos tamén que na PROPOSTA DA ALCALDÍA SOBRE APROBACIÓN DA MODIFICACIÓN DO PROXECTO DE AMPLIACIÓN E CUBRICIÓN DA PISTA POLIDEPORTIVA CEIP FERMÍN BOUZA BREY presentada en febreiro deste ano e aprobada pola Deputación de Pontevedra en maio, consta a imposibilidade de montar gradas, e citamos textualmente: “Una vez procedido el levantamiento topográfico de las instalaciones del CEIP Fermín Bouza Brey y a la elaboración del estudio geotécnico que permitiese conocer las características del terreno, se constató que no resultaría posible crear ese espacio […] por tratarse de un terreno muy irregular y con escasa capacidad portante”, polo que non entendemos que despois dos estudos do terreo, non previran os problemas que agora esgrimen como escusa. 

Entendemos que cando se realiza un contrato do Sector Público, a responsabilidade recae entre a empresa contratada e a administración que a contrata (neste caso o Concello de Ponteareas). Por enésima vez, vemos a irresposabilidade e falta de compromiso coas familias deste centro.

Listaxe do alumnado usuario do comedor escolar 2016/2017

Calendario escolar 2016/2017

Orde do 7 de xuño de 2016 pola que se aproba o calendario escolar para o curso 2016/17 nos centros docentes sostidos con fondos públicos na Comunidade Autónoma de Galicia.

Información relativa ás axudas para material e libros de texto.

1. Bases reguladoras do procedemento de concesión de axudas municipais de apoio ao estudo para o curso 2016/2017 destinadas ao alumnado matriculado en educación infantil (4º, 5º e 6º), FP básica, ciclos formativos e bacharelato. Convocatoria do ano 2016. 
2. Relación definitiva de alumnado admitido para o fondo de libros para o curso 2016-2017 (para ver a lista prema aquí).
3. Listaxe definitiva do alumnado excluído do fondo de libros (para ver a lista prema aquí).
4. Cheque material concedido a alumnado de educación primaria (recoller o cheque a partires do 07/07/2016). 
5. Cheque material denegado a alumnos/as de educación primaria.
6. Relación de alumnado admitido e excluí­do dos cheques de libros de 1º de E. Primaria (recoller o cheque a partires do 07/07/2016).
7. Relación de alumnado admitido e excluí­do dos cheques de libros de 2º de E. Primaria (recoller o cheque a partires do 07/07/2016). 
8. Solicitudes pendentes cheque material.
9. Impresos axudas de libros, fondo de libros e material escolar (preme aqui).

Libros de texto para o curso 2016/2017

Pica para abrir o PDF

SOLICITUDE PARA O SERVIZO DE COMEDOR ESCOLAR

Descarga en PDF

Festa de FIN DE CURSO!

O vindeiro martes 21 de xuño, de 18:00 a 20:00, celebraremos a nosa Festa de Fin de Curso. Haberá xogos populares, xogos de auga e merenda de balde para todas as nenas e nenos. O alumnado asociado entrará gratis e para o resto o importe será só de 1€. Adultos e bebés non pagan. Esta festa é para todo o alumnado de infantil e primaria dos centros de ensino público de Ponteareas. As nenas e nenos terán que vir acompañados dalgún adulto. Ah, e contamos cun seguro de responsabilidade civil. Achegádevos á Festa, imos pasalo de marabilla!

Actividades alternativas á reválida de 3º

Despois de solicitar ao Concello a organización de actividades lúdicas dirixidas ao alumnado de 3º de primaria para os días 24 e 25 de maio en horario de mañá, para aquelas familias que non queiran participar na reválida e teñan complicada a conciliación laboral/familiar INFORMAMOS que a Concellería de Ensino, P.C. e Rexime Interior habilitará instalacións municipais a fin de realizar as actividades que se reflexan no cadro entre as 9 e 14:30 h.

Requírese a inscrición previa no teléfono 673.794.880.

Actividades alternativas á reválida de 6º

Despois de solicitar ao Concello a organización de actividades lúdicas dirixidas ao alumnado de 6º de primaria para os días 11, 12 e 13 de maio en horario de mañá, para aquelas familias que non queiran participar na reválida e teñan complicada a conciliación laboral/familiar INFORMAMOS que a Concellería de Ensino, P.C. e Rexime Interior habilitará instalacións municipais a fin de realizar as actividades que se reflexan no cadro entre as 9 e 14:30 h.

Requírese a inscrición previa no teléfono 673.794.880.

 

 

A ANPA TEA REXEITA A LOMCE E AS SÚAS REVÁLIDAS DE 3º E 6º DE PRIMARIA

Os días 11, 12 e 13 de maio se realizarán no noso centro as probas de avaliación instauradas pola LOMCE para 6º de primaria, e os días 24 e 25 do mesmo mes, serán as de 3º de primaria. Estas probas serán individualizadas e terán resultados específicos para cada alumno e alumna. 

As probas de 3º avaliarán o grao de dominio das destrezas, capacidades e habilidades do alumnado en expresión e comprensión oral e escrita, cálculo e resolución de problemas en relación coa adquisición da competencia en comunicación lingüística e da competencia matemática. O profesorado que lles aplique as probas non poderá ser de lingua -galega ou castelá- nin de matemáticas. Por outra banda, o profesorado que corrixa as probas aínda que si será de lingua e matemáticas, non poderá ser o habitual do alumnado de 3º. 

As probas de 6º avaliarán a comunicación lingüística (castelán, inglés, galego) a competencia matemática e as competencias básicas en ciencia e tecnoloxía. Serán aplicadas e corrixidas por profesorado que non imparta clases a este alumnado.

É o Goberno do Estado quen establece os criterios de avaliación e as características xerais das probas para todo o sistema educativo español e expresará os resultados das probas en niveis. Cada alumno e alumna terá un nivel que constará nun informe que se facilitará -entre outros- ao centro no que curse o seguinte curso escolar. Este nivel etiqueta aos nosos fillos e fillas obviando o traballo e esforzo acadados durante este curso e todos os anteriores.

A ANPA Tea rexeita estas avaliacións por non estar adaptadas á realidade de cada centro e de cada alumno e alumna, por ser claramente clasistas e elitistas, por pretender peneirar ao alumnado socialmente desfavorecido, por ser antipedagóxicas e someter ás nenas e nenos a un estrés innecesario para a súa aprendizaxe e formación. 

En Euskadi, Navarra, Canarias, Castilla-La Mancha, Asturias, Aragón e Cantabria son os propios gobernos autonómicos os que non levarán a cabo as probas, a Comunidade Valenciana e Extremadura fixeron un recurso ao Tribunal Supremo. A principios de abril, a maioría do Congreso votaba a favor da paralización da implantación da LOMCE. En Galicia, as confederacións de ANPAS chaman ao boicot destas probas.

Por todo isto, animamos ás familias a que eviten e rexeiten estas probas non enviando as súas fillas e fillos a clase durante os días das reválidas. O alumnado non perderá materia xa que eses días somentes se adicarán exclusivamente ás probas. Non nos gusta promover o absentismo escolar, mais este é o único xeito de evitarlles a reválida, xa que o profesorado está obrigado a facerlla se están na aula. Cun xustificante de ausencia asinado pola nai, pai ou titor/a é máis que suficiente.

Por outra banda, sabemos a dificultade dalgunhas persoas para conciliar o traballo con estas xornadas, pero cun chisco de vontade e organización entre familias pódese solucionar. As persoas que poidades quedar cos cativos, organizádevos coas que non poden. Formade parte do futuro dos vosos fillos e fillas en todos os aspectos.

Poñemos a vosa disposición o xustificante de ausencia que recomendamos.

APROBASE O REGULAMENTO DE RÉXIME INTERNO

Este borrador foi aprobado en Asemblea Xeral de familias asociadas o pasado martes 12 de abril. As familias asociadas tiveron a posibilidade de participar no mesmo nun proceso de emendas que posteriormente se debateron na asemblea xeral.

Debatéronse temas tan importantes como os votos delegados, a dispoñibilidade da Xunta Directiva ou a confidencialidade dos datos internos. Tras a súa aprobación, o regulamento será redactado incluíndo as emendas aprobadas e en breve poráse a disposición pública. 

Máis información AQUÍ.

REGULAMENTO RÉXIME INTERNO

DÍA DA ÁRBORE NO CEIP FERMÍN BOUZA BREY

O pasado venres 8 de abril, o alumnado do CEIP Fermín Bouza Brey de Ponteareas celebrou o Día da Árbore plantando unha por curso nos xardíns do centro.

Este evento, organizado pola ANPA Tea, contou coa colaboración do Servizo Forestal do Condado - Paradanta, que acudiu a ensinarlles ás rapazas e rapaces da escola como se planta unha árbore e darlles unha charla sobre o entorno e como coidalo.

A directiva da ANPA, mercou sete árbores -unha por cada curso de primaria máis outra para educación infantil- que tiñan que cumprir algunhas das seguintes características: ser unha árbore autóctona, froiteira e dar o froito durante a tempada escolar. Estas condicións son necesarias para que a rapazada non se quede só na plantación, senón que tamén poida seguir os pasos do crecemento da súa árbore a medida que van estudando na aula o proceso, e por suposto, que recollan e saboreen o froito do que coidaron. Así, os cativos e cativas de educación infantil posúen xa unha arandeira, o alumnado de primeiro ten un mandarineiro, o de segundo unha ameixeira, o de terceiro unha amendoeira, o de cuarto unha maceira Urraca, o de quinto unha maceira Tabardilla e o de sexto unha pereira común. Logo da plantación, cada grupo gozou dunha interesante charla sobre os nosos bosques adaptada a cada marxe de idade.

Hai que ter en conta que cada grupo conta cun número de entre 55 e 88 alumnos/as, co que resulta complicado organizar calquera actividade neste centro, pero contamos cun alumnado que se comporta de xeito inmellorable e iso facilita moito esta labor. Por este motivo -o elevado número de alumnado- e porque contamos cun espazo limitado, soamente contamos cunha árbore por curso.

A ANPA Tea agradece a colaboración de Fontán Plant de Covelo, que asesorounos e regalounos unha das árbores; ao Distrito Forestal XVII e máis concretamente a Pablo, Rafa, Berto e Mario, que gañáronse á rapazada ensinándolles a plantalas, e a José e Laura pola interesante charla; e ao profesorado do centro por estar sempre disposto a participar destas actividades.

ASEMBLEA XERAL EXTRAORDINARIA

Borrador de Regulamento de Réxime Interno

Neste curso 2015/2016 a directiva da ANPA Tea confeccionou un borrador de Regulamento de Réxime Interno. Que é isto?

O Regulamento de Réxime Interno é unha norma complementaria dos Estatutos, que vén ampliar, ou complementar a estes en materias non especificadas nos mesmos ou que especificadas, non teñen un desenvolvemento suficientemente amplo. Como tal norma de desenvolvemento, en ningún caso poderá o seu contido ser contrario ao contido estatutario. A existencia deste Regulamento de Réxime Interno non é obrigatoria, pero si conveniente, especialmente naqueles casos en que a redacción estatutaria está rexida por un criterio minimalista.

A vantaxe da súa existencia é que non é obrigatoria a súa inscrición no Rexistro de Asociacións. Habitualmente este documento vén regular, detalladamente, as reunións dos órganos da asociación, o réxime disciplinario e, en xeral, materias que nos Estatutos figuran dun modo superficial.

Este borrador debe ser aprobado en Asemblea Xeral de familias asociadas, pero antes dende a Xunta Directiva damos a posibilidade de participar no mesmo. Para isto, abrimos dende hoxe un prazo de emendas para que todas as familias asociadas poidan tomar parte neste regulamento. Achegamos o borrador coas liñas numeradas e un formulario de emendas para tal fin que podedes cubrir cos datos, as vosas emendas (unha por formulario) de engadido, eliminación ou substitución, a liña a emendar e a argumentación para facer esta emenda. Isto é moi importante, xa que axudará a que se aprobe ou rexeite a emenda.

O prazo de recepción de emendas será de 15 días a partir de hoxe. Podedes deixalas ben cumprimentadas na nosa caixa de correo. Non teremos en conta aquelas emendas que non cheguen en prazo, non veñan no formulario que proporcionamos, non estean ben cubertas ou lles falten datos.

Posteriormente, celebraráse unha Asemblea Xeral de Familias Asociadas para debater e acordar as emendas entre todas.

Falando co Goberno de Ponteareas

O pasado 3 de novembro de 2015, e ante a falla de civismo dalgúns condutores e condutoras que circulan e aparcan pola nosa vila, fixemos unha solicitude ao concello. Unha solicitude razoable ao noso entender:

Uns días despois chegounos a contestación do alcalde, onde se nos informa que o concello non conta "cun número tan elevado de policías" e que "se están a estudar outras medidas alternativas". Aquí a resposta íntegra:

Xa en xaneiro deste ano e ao comprobar que non melloraba a seguridade do alumnado do noso centro e ante a falta de información, tomamos a decisión de utilizar esa fórmula que tan xenerosamente deu o actual goberno á cidadanía para que poidamos elevar as nosas queixas, cuestións ou suxestións: a intervención plenaria. Xa de paso, preguntamos polo comedor e polo patio cuberto, que agora mesmo son as cuestións que máis interesan ás familias do centro:

Ese martes, agardamos pacientemente a que rematará o pleno (comezou ás 20:00 e rematou ás 00:00) para poder facer a nosa intervención, que dixo así:

 

Boa noite a todas e todos:

Veño en representación da ANPA Tea e polo tanto, das familias asociadas á mesma.

1. Como todas sabemos, este curso tampouco temos no CEIP Fermín Bouza Brey un patio cuberto. Este patio cuberto leva pedíndose dende o ano 2000, e incluso en 2008, xa o Servizo de Inspección Provincial facía chegar á Xunta a necesidade do mesmo. Na primeira asemblea de familias asociadas que celebrou a ANPA Tea este curso, o 30 de setembro de 2015, estivo convidada a actual concelleira de educación, Cristina Fernández. Alí explicou ás familias que este curso tampouco temos o patio cuberto por desacordos coa empresa en relación ao presuposto, aínda que reafirmou o seu compromiso de que se fará este ano sen excepción. Sabemos que para a súa construción, hai que contar cuns prazos e cunha boa comunicación coa empresa encargada de levala a cabo. Por iso, e para tranquilidade das familias, solicitamos información sobre este proceso e en que punto atópase na actualidade.
2. Por outra banda, este curso tamén notificáronnos dende a dirección do centro, a apertura dun comedor escolar. De feito, enviouse unha circular ás familias para que solicitaran ser beneficiarias do servizo durante este curso 2015/2016. Desta nova tamén informou logo a concelleira de educación na asemblea citada anteriormente. Asegurou que podería ser xestionado polo concello mentres se tramitaban as solicitudes á Xunta para a súa posterior xestión. O 27 de outubro de 2015, nun Consello Escolar, nos comunica que en poucos días rematarán as obras e xa se poderá abrir o servizo. Esta foi a derradeira información que tivemos sobre o comedor, polo tanto, e para transmitirlle ás familias interesadas, solicitamos información sobre este proceso e en qué punto atópase na actualidade.
3. Por último, o día 5 de novembro rexistramos no concello unha solicitude para asignar máis efectivos da policía local no centro durante a entrada ás 09:00 e a saída ás 14:00 debido a que o centro dispón de tres portas por onde entra e sae o alumnado e á súa inseguridade ao cruzar a estrada ou mesmo transitar polas beirarrúas. A resposta foi rápida e concisa: o día 11 de novembro, o alcalde comunícanos que o concello non dispón dos tres policías que farían falla durante 10 minutos á entrada e outros 10 á saída, pero estudan medidas alternativas para garantir a seguridade do alumnado. Polo tanto, solicitamos información sobre estas medidas alternativas e en qué momento se tomarán.

Moitas grazas por permitirnos a intervención e un saúdo.

 

Mostramos circular do centro para solicitar ser beneficiaria do comedor escolar:

Ao rematar a nosa intervención, comunicáronnos que seríamos informadas por escrito sobre as nosas consultas e dito e feito, a resposta chegou:

 

Qué che parece?

Festa de ENTROIDO da ANPA Tea!

Para infantil e primaria dos centros públicos de Ponteareas. Alumnado asociado de balde! O resto só un euro. Haberá postres de entroido.
MENORES ACOMPAÑADXS DE UN/HA ADULTO/A.

 

8 de febreiro de 2016 de 18:00 a 20:00 no Centro Artístico Sportivo. Agardámoste!